ان شاء الله تمام..
جبتلكم قصتي مع صديقاتي في المدرسة وهبالتنا في ثالث ثانوي ، المهم احنا
في المدرسة حقتنا نعتبر أشغب فصل في المدرسة كله مافي لا معلمة ولا ادارية
الا تشتكي مننا
مساكين طلعنا عيونهم..
ومن بعض هبالاتنا ان في يوم من الايام كنا في حصة العربي نايمين
والمعلمة في وادي واحنا في وادي وإذا المعلمة سألت سؤال مافي الا طالبة
وحدة والله ماأكذب لحالها المسكينة جالسة تشارك .المهم جلسنا ننتظر نهاية
الحصة ودق الجرس أخيراً
واكتشفناا ان الحصة اللي بعدها حديث والمعلمة حقتها موتجيب النوم الا تخلي
الواحد ينام ويحلم ويشخر كمان ، المهم وحدة من البنا صاحبة الفزعات جات في
بالها فكرة انو نهرب من الحصة واقتنعوا البنات على طول وبدؤا تهديد في
البنات الهاديين والدوافير الى أن اقنعنا الفصل كله ونزلنا والحمدالله
انوا المراقبة حقت فصلنا ماكانت موجودة ونزلنا كلنا من الدرج الخلفي
للمدرسة وقعدنا في احر الساحة نغني ونسولف شوية ارسلنا وحدة تروح تشوف
الأحوال الجوية فوق؟؟؟
شوية والبنت جاية تركض من الخوف تقولنا انو المعلمة نازلة من الدرج الخلفي
واحنا على طول حطينا رجلنا جري نروح للباب الرئيسي مامدانا نوصل الا نشوف
المراقبة جاية من هناك . فحطنا ورجعنا ومالقينا مفر المعلمة هنا والوكيلة
هناك مافي مكان الا الحمامات<< الله يكرمكم، ودخلنا كلنا هناك واللي
بدأت تتوضا واللي تسوي انها تمشط شعرها واللي ماشاء الله مخلصة الوضوء
وجالسين يتشهدوا . وشوية الا المراقبة تصرخ علينا وهي معصبة مننا ماسابتنا
لحظة الا احنا اختفينا
وصرخت ايش تسوووو هنااااا؟واحنا من الخوف مااحد قدر يرد وحدة من البنات
تشجعت وقالت بصوت واطي ياابلة احنا نزلنا نتوضا ونصلي الضحى جماعي ..صرخت
علينا كلكم نازلين تصلوا الضحى جماعي كل الفصل ايش هذا الالتزام اللي نزل
عليكم فجأءة بسرعة قدامي عند المديرة انا بدت رجولي تصفق ببعضها لاني
مااحد قد صرخ عليه والمديرة لحالها أصلا فيلم رعب وانزفينا لعند المديرة
لقينا المديرة مشغولة ووقفنا برة ننتظرها تخلص والبنات من الرعب اللي فيهم
جاتهم حالة ضحك غريبة وبدأوا يضحكوا والمراقبة عصبت علينا تضحكوا على
انفسكم نفسي افهم من هذي اللي قدرت تسيطر على عقولكم وتنزلكم كلكم ..وهيه
تهزئ سمعنا صراخ المديرة انا قلبي وقف وبديت ارقص من الخوف والله مديرتنا
ماعندها كلام تعطيك كف تطيح سنونك كلها.المهم خرجت وجلست تصرخ علينا من
صراخها المعلمات اللي في الدور الثالث سمعوا وانا في حالة رعبي الا اسمعها
تناديني قلت في نفسي جاك الموت ياتارك الصلاة ، جات وقفت قدامي تقولي حتى
انتي معاهم مااصدق وانا خلاص شوية واطيح من طولي بعد كذا راحت من عندي
وجلست اقول أذكار ماادري من فين وبعد دش التهزيء عقوبتنا اننا ننقص في
مادة الحديث واحنا معدل تراكمي..وتم الإفراج عنا وطلعنا فصلنا بدون اصابات
وكان رعب بس حماس وطلعنا نكمل مخطاطاتنا للأيام الجاية ...